१२ मंसिर,
बर्दिया । बर्दियाको जमुनि प्रहरी चौकीबाट खटिएको टोलीले भारत–नेपाल सिमानास्थित फुटाह चेकपोस्टबाट लागू औषधसहित एक युवकलाई नियन्त्रणमा लिएको छ।
प्रहरीका अनुसार भारततर्फबाट साइकलमा नेपाल प्रवेश गर्दै गरेका जिल्ला बाँके, बैजनाथ गाउँपालिका–३ का २० वर्षीय रबिन्द्र कुमार थारू शंकास्पद रूपमा देखिएपछि चेकजाँच गर्दा उनीसँग लुकाइ-छिपाइ राखिएको प्लास्टिक पुडियामा रहेको करिब १ ग्राम ९१० मिलिग्राम तौलको पदार्थ फेला परेको थियो। प्लास्टिक खोली शुद्ध तौल गर्दा करिब १ ग्राम ६६० मिलिग्राम लागू औषध (ब्राउनसुगर) जस्तै देखिने खैरो गिलो पदार्थ बरामद गरिएको प्रहरीले जनाएको छ।
थारूलाई घटनास्थलमै नियन्त्रणमा लिएर इलाका प्रहरी कार्यालय मैनापोखर बर्दियामा राखी आवश्यक अनुसन्धान अघि बढाइएको प्रहरीले जानकारी दिएको छ।
